كفر بهانة

 
الاحد 23 يونيو 2013
ـــــــــــــــــــــ

الحلوة دى قامت تلطم فى البدرية
وغراب بينعق ياخرابى فى البدرية
لمى العجين يانبوية ويافوزية
يجعل صباحك صبح الشوم انت وهيَ
....
احتدم الصراع والجدال والقتال فى كفر بهانة
جميع اهل الكفر احتشدوا رافعين المشاعل امام دوار العمدة
بينما اجتمع الاخير بكل رجالات الكفر واهل الرأى واصحاب الاراء المعارضة فى الدوار البحرى الفسيح .
اختلط الحابل بالنابل وارتفعت الصيحات وتناثرت الاقوال وتعالت الاصوات المتنافرة لتصنع ابشع صورة من صور الاجتماعات شكلا وصوتاً
ـــ الجراد ياعمدة هلك محصول القمح...وانت ولا انت هنا..
ـــ ووابور الطحين اتحرق بجاله كام يوم وشيخ الغفر لاودا خبر ولا جاب خبر..
ـــ ومطاريد الجبل اللى كل ليلة يسرجوا بهايمنا ويحرجوا غيطانا..
ـــ طيب ورجالة شيخ البلد اللى بنجول عليهم انهم زينة الكفر ...كل ما نحكمهم فى ايوتها موضوع بيجوا على الغلبان فينا ..
ارتفع صوت جهورى معترضا
ـــ اخرس منك ليه ...التحجيجات لساتها شغالة فى كل مواضيعكم ...هو شيخ الغفر هايعمل ايه ولا ايه ياغجر ..
ـــ مايصحش كده يابو حسنين ..احنا برضو معذورين..
مش من حجك انك تشتمنا ولا تهنا ...احنا برضوا رجالة ورا كل منا الف راجل وراجل ..
انطلق صوت شيخ كفيف يضرب الارض بعصاه الغليظة
ـــ ياولاااااااد ....المصرف العمومى مش مريحنى...شكله هايغرج البلد..

تتجاهله الانظار والاصوات لتعود فتحتدم اكثر واكثر ..
ـــ طيب والترعة الجبلية اللى ردمها ابو ادريس وجففت الزرع وبورت الارض عاملتوا ايه فيها...؟؟
ـــ ولا الولد الصغار اللى كل يومين نلاجى جتة واحد فيهم راميها الرياح وميتة غرجانة....ما انش الاوان نعرف مين اللى ورا جتلهم فطيس بالشكل ده ..؟؟
ـــ طيب واشغالنا اللى عطلها مشروع السوج الجديد اللى فضلت تجنع فينا انه كلاته خير للبلد ولا شوفنا منه الا سواد الحلل والازانات ..
ــــ ياخوااااااااانا ..انا شامم ريحة المصرف بتجرب مننا ..
ـــ يعنى اذا كانت العمودية كبيرة عليك ياكبير سيبها لاهلها ..
ــــ ايوه ...احنا اهلها ...احنا اشراف البلد كابر عن كابر
طول عمرها كانت فى دوارنا موروثة اباً عن جد..
هب العمدة من جلسته عاقدا مابين حاجبيه ناهرا بيده الجميع
ـــ اختشى على دمك منك ليه ليه ليه...
قاطع كلماته انطلاق رنين جرس التليفون فاذا باحد الخفراء يحمله الى العمدة...
سكت الجميع بين تمتمات واعتراضات مكتومة..
امسك العمدة بالسماعة.......مين ...المركز .....
هنا بزغت الكلمات المتهكمة ...يادى المركز واللى فى المركز ..
تكلم العمدة هامساً ثم وضع السماعة وواجه الجميع...

ـــ انا عمدتكم برضاكم انتم وبانتخابات العمودية اللى عمر الكفر ماشاف زيها..اما انتم ياولاد البركاوى فعمركم ماهاتنولوها تانى
كفاجم اللى عملتوه فى الكفر سنين وايام..
ارتفعت الاصوات تعترض واصوات اخرى نابحة
ـــ احنا معانا السلطة والنفوذ ...الجاه والمال ياعمدة ...احنا معانا اللى يخلى الكل ينخى ويطيع ويسمع الكلام ...
ـــ والله على رجابينا لو وصلت ليكم تانى يا هليبة يا نهيبة ..
ـــ تبجى العمودية تروح لدوارنا احنا ...احنا احج بيها..
نظر الجميع للمتكلم بتعجب واستنكار..
هاجمته اصوات عدة
ـــ انت بتجول ايه ياشيخ نعيم ...؟؟ اتخبطت فى عجلك ولا ايه ..
عمودية ايه دى اللى بتحلم بيها ...دى بعيدة عن شنبك انت والكام عيل اللى فى عيلتكم ..
قامَ نعيم غاضبا صارخاً
ــ ده كان زمان الحكى الماسخ ده
دلوجتى الكام عيل اللى مش ملين عينيكم دول زى الملح
كل اهالينا فى الكفور التانية معانا ومستعدين لاى مواجهة وحديت معاكم ..
هب احد الرجال غاضباً
ـــ والله يا عجوز الشوم انت ...لانت ولا مليون زيك ينولها ابداً
والله ليحوم الحوم ويعوم العوم والدم يبجى للركب ولو كان جصاد الواحد منكم عشرة منينا ...
رددت اصوات ..
ـــ لابجى ...الموضوع مش فتونة ولا لوى دراع...
ولو عاوزنها دم احنا نولعوها
ـــ ايوه ..الحج يجول ان احنا نجسموها بينتنا...
ــــ تجسموا ايه منك ليه ..؟؟
هى العمودية بتتجسم كمان ....؟؟!!!
ــــ لا والرب بينتنا احنا مابنريد نجسم العمودية ...احنا بنتحدت على تجسيم الكفر ...
انطلق الصوت المبحوح من الشيخ الكفيف وهويضرب الارض بعصاه ضربة قوية اسكتت الجميع
ــــ الريحة بتجرب هاتخنجنى يا ولاااااااااااد ....
يارب يكون السد اللى بنيتوه قدام المصرف جوى ويتحمل...
نظر اليه الجميع بين استهتار واستنكار وتأفف فى حين علق البعض عليه ..
ـــ والنبى تنجطنا بسكاتك ياشيخ ...
انت صحيح بركة الكفر لكن بالله عليك مش نجصاك دلوجيتى..
كان العمدة يقف صامتا يجول ببصره فى الجميع عندما قام رجل مخاطبا اياه..
ــ احنا هانديك مهلة لاخر الشهر ياعمدة..
اذا ما فكرتش بعجل ومفهومية وخدت جرارك بترك العمودية بكيفك يبجى ماتلومش الا نفسك بجى...
قال ذلك وتوجه الى الشرفة المطلة على امام الدوار ليواجه الجمع المحتشد ...
قام الكثيرون بمجرد رؤيته فرفع لهم يده ...فارتفعت اياديهم بالمشاعل فى صيحات عالية ..
عاد الرجل الى الداخل ليخاطب العمدة ..... شفت ياعمدة ..
مش هاجول الكل معايا ...لكن هاجول الاكترية مش هاتسكت تانى..
امتعض وجه العمدة متفكراً واذا برنين التليفون يرن عاليا ..
همهمت الاصوات تتهكم من جديد .... ياااادى المركز ...
احضر الخفير التليفون للعمدة...
نظر اليه الاخير والرنين يتواصل ...
طالت نظرة العمدة الى التليفون وصوت الرنين يتعالى فى حين خيم الصمت على الجميع ...واذا بالعمدة يضرب التليفون بكفه ليسقطه ارضاً من يد الخفير فيصمت الرنين ويعلو صوت الشيخ الكفيف..
ــــــــ شامم ريحة مية عفنة..... المجارى والطرنشات شكلها طفحت يا ولاد بهااااااااانة .. المصرف غرق البلد ولانتوا داريين ...
المياة السوداء العطنة تزحف من خلف الدوار لتفاجىء الجميع فى اماكنهم
...تخبط الكل فى لحظة ضياع غير مدركين اين يضعوا اقدامهم..
....................... تمــــــــــــــــــــــــــــت .....................